Jasir Asani e ka nisur me fitore aventurën e tij në Hungari me Kisvardanë, duke mposhtur Ferencvaroshin. Për am bientimin e tij atje, për kohën te Partizani, për ekipin e vjetshëm, raportin me Çinarin e Zhuniorin, largimin e Ferhan Hasanit dhe shumë tema të tjera, Asani ka folur në një intervistë ekskluzive për “Panorama Sport”, në një rrëfim ndryshe nga herët e tjera…
Aventura me Kisvardanë – E filluam kampionatin në mënyrën më të mirë të mundshme me një fitore shumë të rëndësishme, kundër ekipit më të mirë në Hungari, Ferencvaroshit. Më kanë pritur shumë mirë në Hungari, jam në një klub shumë të madh, me lojtarë cilësorë. Nga dita e parë, jam ambientuar dhe jam i lumtur që jam këtu, për ta ndihmuar ekipin me cilësitë e mia.
Objektivi me Kisverdanë- Unë dua ta ndihmoj ekipin që të arrijmë objektivat edhe të arrij gjithashtu edhe objektivin tim që i kam vendosur vetes, që të shënoj gola edhe të bëj një sezon shumë të mirë. Dua që me golat e mi dhe me asistet ta ndihmoj skuadrën që të arrijmë objektivat. Sezoni në Shqipëri do të fillojë më 11 shtator.
Krijuat një sulm të frikshëm me Çinarin dhe Zhuniorin, por tashmë vetëm Stenio ka mbetur në ekip. Keni ndonjë peng, ndoshta do të dëshironit që kjo treshe të vazhdonte pak më shumë?
Kemi pasur një ekip shumë të mirë vjet, por edhe ne treshja përpara bëmë një sezon shumë të mirë. Kemi qenë bashkë gjithmonë për ta ndihmuar ekipin. Çdo lojtar do të kishte dëshirë të luante në një ekip si ai i vjetshmi, të ishim për shumë vite bashkë, por kështu është futbolli…
Mesazhi për tifozët e Partizanit- Unë jam i lumtur që kam bërë shumë për Partizanin, edhe që fituam titullin kampion, për t’i bërë të lumtur tifozët, sepse kishin shumë kohë që e kishin pritur me padurim. Çdo sakrificë, çdo ndeshje, çdo stërvitje kanë qenë afër ekipit. E di që janë mërzitur, por edhe unë jam mërzitur që nuk do t’i kem më pranë tifozët më të mirë. Gjithashtu, kam qenë shumë i mërzitur edhe që nuk arritëm ta fitonim titullin edhe vjet, por për mua do të jenë gjithmonë në zemrën time, familja e kuqe dhe tifozët. Nuk kam çfarë them më për ta, thjesht janë fantastikë edhe u kërkoj falje, por futbolli i ka këto gjëra, që një ditë do të ndahesh.
Objektivat e Partizanit në sezonin e ri- Janë shumë pak lojtarë nga sezoni i shkuar. Kanë bërë blerje të reja, shpresoj të bëjnë një sezon të mirë. Të gjithë e dimë që kampionati shqiptar është shumë i fortë, por besoj se nëse lojtarët e kuptojnë çfarë fanelle kanë veshur, Partizani do të shkojë sa më lart.
Goli më i rëndësishëm për Partizanin- Të gjithë golat kanë qenë të rëndësishëm, sidomos vitin që dolëm kampionë. Nuk mund të ndaj asnjë, për mua të gjithë janë të rëndësishëm.
Po momenti më i paharrueshëm?
Momenti më i mirë që kam përjetuar, ka qenë titulli kampion që fituam me profesor Gegën. Nuk do ta harroj asnjëherë kur kam parë shumë tifozë duke qarë, duke festuar. Ka qenë momenti më i mirë për mua.
Në gjykimin tuaj, a do ta gjejë Partizani “Jasirin e ri” apo është e vështirë?
Nuk e di çfarë të them, duhen pyetur tifozët (qesh)… Edhe mund ta gjejnë, sepse ka lojtarë të mirë në Shqipëri.
Besoj e keni ndjekur Partizanin në ndeshjet e Ligës së Konferencës. Si ju është dukur ekipi?
Sigurisht që e kam ndjekur dhe gjithmonë do ta ndjek edhe në kampionat. Kanë bërë shumë mirë në Europë, me lojtarë të rinj. Besoj se kanë bërë shumë mirë, ka cilësi në ekip.
Do të riktheheni sërish një ditë në Superiore apo te Partizani?
Po, pse jo. Do të më pëlqente ndoshta një ditë të kthehesha prapë te Partizani, sepse më ka ndihmuar shumë edhe jam i lumtur që kam qenë pjesë e këtij klubi. Asnjëherë nuk i dihet si mund të shkojë futbolli, por tani jam i fokusuar që të bëj një sezon shumë të mirë tek ekipi ku jam. Partizani do të ngelet në zemrën time përgjithmonë…
/Panoramasport
