Harry Kane dhe Leo Messi! Pep Guardiola është ndalur te këta dy lojtarë në prononcimin e fundit. Trajneri i Manchester City konfirmon interesimin për kapitenin e Tottenham, teksa flet edhe për yllin argjentinas në konferencën për shtypin.
“Harry Kane është një futbollist i shkëlqyer dhe i jashtëzakonshëm, nuk ka fare dyshime për këtë. Sigurisht që ne jemi të interesuar për të, por ai është një lojtar i Tottenham dhe nëse ata nuk duan të negociojnë nuk kam çfarë të shtoj.
Nëse ata duan, ne do të provojmë të blejmë Kane. Messi? Ne shpenzuam 100 milion £ për Jack Grealish, sepse ishim të bindur për cilësitë e tij por ishim të bindur edhe që Messi do të rinovonte me Barcelonën.
Kështu që për momentin, Leo nuk është pjesë e mendimeve tona, absolutisht që jo. Largimi i tij ishte një surprizë për të gjithë, por presidenti Laporta ishte i qartë sot. Nuk kam biseduar as me presidentin dhe as me Leon, pra nuk e di se çfarë ka ndodhur.
Si tifoz do të doja që ai të qëndronte te Barcelona, por sot klubi duhet të jetë i qëndrueshëm dhe ajo që ndodhi vitin e kaluar nuk ishte aspak e bukur.
Si tifoz kam një mirënjohje të jashtëzakonshme për lojtarin më të jashtëzakonshëm që kam parë në jetën time dhe për titujt që më ndihmoi të fitoja në Barcelonë“, theksoi trajneri katalanas i kampionëve të Anglisë.
