Ftesa për pjesëmarrjen e këngëtarit serb, Goran Bregoviç, shkaktoi reagime të shumta nga personazhe të njohur shqiptarë e kosovarë në mënyrë që kjo mos të lejohet.
Administratori i ‘Birra Korça’, Dhimitri Zonja i pyetur sot lidhur me ‘Festën e Birrës’ dhe pjesëmarrjen e këngëtarit serb, Goran Bregoviç në këtë aktivitet ka sqaruar për televizionin ‘News24’ se i gjithë aktiviteti organizohet nga Bashkia e Korçës dhe është pikërisht ajo që vendos dhe për të ftuarit.
“Këto ditë ka pasur disa spekulime dashakeqe lidhur me ftesën që i është bere këngëtarit serb Goran Bregoviç për të qenë pjesëmarrës në festën e përvitshme të birrës në qytetin e Korçës. Ne e dimë se festa e birrës në Korçë identifikohet si festa e Birrës Korça që është simbol i qytetit, por ky aktivitet nuk organizohet prej nesh. Është bashkia Korçë që vendos për gjithçka që ka të bëjë me festën, përfshirë edhe listën e të ftuarve. Ne jemi një nga subjektet pjesëmarrëse që kemi obligim përfaqësimin sa më dinjitoz të produkteve tona që i kanë sjellë Korçës këtë festë”, ka deklaruar administratori i ‘Birra Korça’.
Shumë personazhe të famshëm kanë kërkuar bojkot të këtij Festivali, madje ka prej tyre që e kanë anuluar ftesën e tyre duke mos pranuar për të performuar aty, ndërsa të tjerë si nOizy kanë kërcënuar se nëse nuk anulohet do nxisë fansat të përdorin dhunë ndaj tij.
