Ish-Kryeministri Sali Berisha i ka drejtuar një thirrje Sekretarit amerikan të Shtetit, Antony Blinken, që të depozitojë në Gjykatën e Parisit, çdo fakt apo provë që ka, lidhur me vendimin e shpallur prej tij, për shpalljen non grata të liderit historik të demokratëve dhe familjarëve të tij.
Berisha tha se avokati i tij ka depozituar në Gjykatë padinë kundër Sekretarit Blinken, ndërsa theksoi se vendimi për shpalljen non grata, është i pabazuar në fakte dhe prova.
“Nuk ekzistojnë provat dhe faktet, ndaj dhe nuk paraqiten”, theksoi Berisha në një konferencë për median. Ai i qëndroi deklarimeve të mëparshme se vendimi marrë kunder atij dhe familjarëve të afërt, bazohen në shpifjet e Edi Ramës dhe George Soros.
Berisha tha se padinë e ka ngritur kundër shpifjeve që kanë çuar në marrjen e një vendimi të tillë për shpalljen non grata.
Duke iu përgjigjur deklarimeve të ambasadores Yuri Kim, Berisha tha se “përveç presioneve që kërkojnë që unë të mos futem në Kuvend, nuk ka asnjë fakt dhe provë”. Berisha tha se Ambasadorja Kim është unike në Botë.
“Kim pasi lavdëroi masakrën zgjedhore, kërkon ti imponojë vendit se kush duhet të futet dhe kush nuk duhet të futet në Parlament. Kim është njeri i shkolluar mirë, ka lexuar edhe Enver Hoxhën, edhe Abraham Lincoln, edhe Kim Ji Sun, por një gjë dua tu them se diktati dhe bari janë një binom i pandarë”, tha Berisha.
