Natën e Shenjtë të festës së Lindjes së Jezu Krishtit, Papa Françesku do të kremtojë Meshën solemne në Bazilikën e Shën Pjetrit, në Vatikan, në ora 21.30. Më 25 dhjetor, Ditën e Krishtlindjes, në ora 12.00 nga Shën Pjetri në Vatikan, Papa do t’i drejtojë Romës e Botës mesazhin e Krishtlindjes dhe Bekimin e tij Apostolik.
“Për Krishtlindje, t’i bëjmë vend Jezusit, në vend të shpenzimeve dhe zhurmave. Për Krishtlindje, ashtu si Maria, t’i bëjmë vend Jezusit, që vjen”. Kjo këshilla e Kishës në festën më të bukur të vitit, Krishtlindjes, që u kujton të krishterëve frymën, me të cilën duhet jetuar lindja e Foshnjës Hyjnore.
“Kisha është në pritje, ashtu si Maria, që mezi ç’pret ta shohë në fytyrë birin e saj. Edhe ne, si Kishë, e shoqërojmë Zojën Mari në këtë kohë, duke pritur me padurimin e saj”, deklaron Vatikani dhe më tej lëshohet ky mesazh për njerëzit.
“Jemi në pritje, apo të mbyllur në vetvete? Jemi vigjilentë, apo të sigurt në ndonjë hotel, që kemi hasur gjatë udhës e nuk duam të ecim më përpara? Jemi shtegtarë, apo endacakë? Prandaj Kisha na fton të lutemi me fjalën ‘Eja!’, sepse kështu ia hapim portat zemrës dhe e mësojmë shpirtin të jetë në pritje. Të vigjilojë! …Ç’ndodh me shpirtin tonë, kur Zoti vjen e ç’ndodh kur nuk vjen? Ka vend për Zotin, apo ka vend vetëm për festë, për shpenzime, për zhurmë… A e kemi të hapur zemrën, siç e ka hapur portën Kisha Nënë e siç e kishte Zoja? Apo shpirti ynë është bërë sa një grusht dhe në portë kemi varur një pusullë – me fjalë plot edukatë – që thotë: ‘Ju lutem, mos na shqetësoni!’.
