KLSH ka kallëzuar në SPAK 5 zyrtarë të Ministrisë së Brendshme për akuzën “Shkelja e barazisë së pjesëmarrësve në tendera apo ankande publike”. KLSH ka gjetur shkelje në tenderin me objekt “Studim, Projektim i disa objekteve të Policisë së Shtetit”.
Kontrolli i Lartë i Shtetit njofton se ushtroi auditim financiar dhe përputhshmërie në Ministrinë e Brendshme, duke i kushtuar vëmendje të posaçme çështjeve që lidhen me aktivitetin ekonomiko-financiar të saj për vitet 2018, 2019 dhe 2020.
“Nga procesi i auditimit kanë rezultuar mospërputhje dhe devijime ligjore, si pasojë e shkeljeve të dispozitave ligjore në procedurat e prokurimit publik, të cilat kanë cenuar barazinë e pjesëmarrësve dhe operatorëve ekonomik në këtë procedurë dhe njëkohësisht rritje të paargumentuar të vlerës së kostove të ndërtimit dhe kostove të projektimit në procedurën e prokurimit me objekt ‘Studim, Projektim i disa objekteve të Policisë së Shtetit’, ku përfshihen Drejtoria Vendore e Policisë Vlorë, Komisariati i Policisë Nr.4 Tiranë, Komisariati i Policisë Pogradec, Komisariati i Policisë Mirditë”, sqaron KLSH.
Kontrolli i Lartë i Shtetit në lidhje me këto shkelje ka depozituar në Prokurorinë e Posaçme Kundër Korrupsionit dhe Krimit të Organizuar kallëzim penal ndaj 5 funksionarëve të Ministrisë së Brendshme, përgjegjës për vlerësimin e ofertave në procedurën e prokurimit me objekt “Studim, Projektim i disa objekteve të Policisë së Shtetit” për veprën penale të “Shkelja e barazisë së pjesëmarrësve në tendera apo ankande publike”.
Disa javë më parë, policia arrestoi me urdhër të Gjykatës së Posaçme 9 zyrtarë e ish-zyrtarë të Ministrisë së Brendshme, për abuzim me tenderin e uniformave të policisë.
