Gazmir Cani, ishte i riu i cili “nxori” zbuluar paaftësinë e Forcave Operacionale të Tiranës, i cili u iku me Benzin e tij në mënyrë spektakolare nga duart efektivëve që po zhvillonin një operacion anti-drogë në zonën e quajtur ‘Varri i Bamit” në Tiranë. Një skenë si nëpër filma aksion ishte momenti kur ai i dha gaz makinës, mirëpo në dëshminë e tij kur është marrë në pyetje, 26 -vjeçari, shoferi i Mercedes Benz, me targë AA 909 YE ka mohuar që të ketë qenë pjesë e grupit kriminal që po merrej me trafikun e drogës. Ai ka dëshmuar se ka ikur me shpejtësi pasi ka menduar se po i vidhnin makinën, ndonëse në videon e siguruar duken efektiv të veshur me uniformë policie dhe u dëgjuan thirrjet “Ndal Policia”, përtej fjalëve banale që policët përdorën në ato momente.
26-vjeçari u arrit të neutralizohej nga policia rreth 200-300 metra më tutje ku pas kontrollit të ushtruar në makinën e tij, nuk u gjet asgjë e dyshimtë, as për lëndë narkotike apo armë, e për këtë arsye ndaj tij është ngritur vetëm një akuzë, ajo e “Kundërshtimit të punonjësit të policisë të rendit publik”, parashikuar nga neni 236/2 i K. Penal.
Nga ana tjetër, sa i përket të arrestuarve të tjerë Gentian Kore, Altin Gega dhe Erjon Prengaj, kanë deklaruar se nuk dëshirojnë që të japin shpjegime në këtë fazë të hetimeve, teksa Taulant Çoku, një tjetër person që i janë vënë prangat është shprehur se ishte gjendur në ambientin e dyqanit në momentin e gabuar dhe se nuk ka lidhje me shitblerjen e lëndëve narkotike.
Lidhur me këtë operacion është shpallur në kërkim Eduard Perhati (Skenderasi), ai që kishte kutinë e picave, ku ishte fshehur droga. Perhati është futur mes pallateve në rrugën “Gjolek Kokona”, dhe pranë një klinikë dentare,ka hedhur poshtë një makine të parkuar dy kutitë e picave dhe është larguar me vrap dhe ku me gjithë ndjekjen e bërë u është larguar shërbimeve të policisë.
