Vladimir Petkoviç do të mbahet mend si trajneri më jetëgjatë i kombëtares së Zvicrës. Pas 7 vitesh trajneri vendosi që të nisë një aventurë të re me klubet teksa ndodhi gjithçka shpejt me firmën e tij në krye të Bordeaux në kampionatin francez.
Tashmë helvetët po kërkojnë një trajner të ri por nuk mund të mungonte përshëndetja e Granit Xhakës, kapitenit të kombëtares për trajnerin e tij që largohet pas kaq shumë vitesh.
“Çfarë rrugëtimi! Trajner, unë vetëm dua t’iu falënderoj për gjithçka. Ne bëmë historinë së bashku!
Ka qenë një udhëtim i pabesueshëm, faleminderit për gjithë punën tënde të palodhur, për mbështetjen tënde dhe për mënyrën sesi e ke formuar një ekip kombëtar në një grup vëllazëror. Ne nuk do ta harrojmë punën që keni bërë dhe ju urojmë gjithë të mirat tek skuadra e Bordeaux”.
Petkoviç ka thyer rekordin e numrit të ndeshjeve në stolin e Zvicrës të cilën e udhëhoqi në Botërorin e 2018 dhe në dy faza finale të Kampionateve Europiane teksa në Euro 2020 arriti të eliminonte edhe favoritët e Francës.
