Një operacion policor për kapjen e një personi, identiteti i të cilit nuk dihet, ka përfunduar në një përplasje mes forcave speciale dhe disa gazetarëve e qytetarëve.
Disa policë civilë, që siç duket nga pamjet i përkasin forcave speciale, RENEA apo operacionales, tentojnë të ndalojnë një automjet, i cili largohet, dhe gjithë zemërimi i policëve shfryhet mbi gazetarin Ergys Gjençaj, që tentoi në një moment të filmojë skenën.
Gazetari merret forcërisht, shtrihet në tokë, ndërsa policët nuk marrin parasysh se personi në fjalë është një njeri i medias.
Sjellja e dhunshme e policëve të Ardi Veliut vijon ndaj disa qytetarëve, që siç duket edhe ata kanë menduar të filmojnë skenën.
Gjithçka ndodh në zonën e Varrit të Bamit në Tiranë, ku pas dështimit të operacionit, për të cilin nuk ka asnjë njoftim zyrtar, tentohet të mbulohet paaftësia e pjesëmarrësve në operacion me dhunë dhe presione ndaj gazetarëve, që rastësisht qëlluan në një vendngjarje, si dhe banorëve të zonës.
Po të ishin treguar pak më profesionalë, ata policë që morën pjesë në operacion do të mund të kishin ndaluar objektivin, ndaj të cilit nuk u kursyen sharjet, ndërsa askujt nuk i shkoi në mend se me një veprim të thjeshtë, qofte edhe duke i thyer xhamin anësor do të shmangej e gjithë situata që krijuan.
