Botimet online të gazetave kryesore suedeze u paralizuan mbrëmjen e djeshme për disa orë nga hakerat anonimë, njoftoi sot policia e cila nisi një proces hetimor.
“Ky është një sulm ekstremisht i rrezikshëm dhe serioz”, deklaroi drejtuesja e Shoqatës suedeze të Botuesve të Gazetave, Jeanette Gustafsdotter, cituar nga agjencia e lajmeve suedeze TT.
“Të kërcënosh qasjen në mbulimin mediatik është e barazvlefshme me kërcënimin e demokracisë”, u shpreh ajo.
Këto sulme, ende pa autor shkaktuan paralizimin e pjesshëm ose të plotë mbrëmjen e djeshme nga ora 20:00 (19:00 GMT) deri rreth orës 23:00 (22:00 GMT) të web faqeve të shtatë gazetave më të rëndësishme : Dagens Nyheter, Svenska Dagbladet, Expressen, Aftonbladet, Dagens Industri, Sydsvenskan dhe Helsingborgs Dagblad.
