Roberto Mancini insiston se Inter është akoma në garë për vendin e tretë, që do të thoshte kualifikimi për në Champions League, megjithëse arritën vetëm një barazim në ndeshjen e djeshme kundër Roma-s.
Inter ishte vetëm gjashtë minuta larg fitores së parë në “Stadio Olimpico” që prej vitit 2008, pas golit të Perisic.
Por mesfushori Nainggolan nuk e lejoi ekipin milanez të shkonte në shtëpi me një fitore duke shënuar goline barazimit pak para përfundimit të takimit. “Ekipi bëri një paraqitje të shkëlqyer. Na kanë mbetur edhe 8 ndeshje deri në fund, nëse i fitojmë të gjitha jam i sigurt që do të përfundojmë në vend të tretë. Ka tre ekipe mbi nesh, Juve, Napoli dhe Roma, të cilët e filluan sezonin si pretendentë, edhe ne jemi aty dhe do të vazhdojmë luftën për një vend në Champions,” shprehet trajneri i Inter.
“Po luanim shumë mirë derisa Dzeko u fut në fushë. Më pas na u vështirësua puna sepse ata filluan të luanin me topa të gjatë. Duhet të kishim shënuar golin e dytë. Jemi të dëshpëruar që duhet ta përballonim këtë ndeshje pa tre sulmues, nëse do të kishim pasur njërin mes Icardi-t, Palacio dhe Jovetic, besoj se do ta kishim fituar ndeshjen.” Edhe Fiorentina e vendit të pestë është në garë për vendin e tretë, momentalisht ndodhen një pikë larg Inter, me një ndeshje më pak, e cila do të zhvillohet sot kundër ekipit të Frosinone-s.
