Ish-deputeti socialist Koço Kokëdhima, gjatë fjalës së tij në Asamblenë e PS-së, ka hedhur akuza të forta në drejtim të drejtuesve të lartë të partisë, por në veçanti ndaj kryetarit të saj dhe ish-mikut të tij Edi Ramës.
Ai kishte përgatitur një fjalim të gjatë për të mbajtur në asamblenë socialiste, duke e nisur me drejtuesit e partisë. “Drejtuesit më të lartë të partisë sonë komplotuan kundër mandatit tim me qëllim që të eleminonin rolin, ndikimin dhe funksionet e mia si deputet dhe si drejtues partie. Qeveria jonë ishte në dijeni përpara se të shqyrtohej çështja në Kushtetuese, për vendimin që do të merrej nga kjo gjykatë”, tha Kokëdhima.
Por ish-deputeti ka hedhur akuza të forta për Edi Ramën në lidhje me plehrat.
“Edhe inceneratorin e Bechetit, Rama po e vë në jetë. Inceneratorët janë e vetmja gjë e re në rrethanat e pas vitit 2013. U kthye ligji i importit të mbetjeve vetëm për të ushqyer këto monstra me plehra të valorizuara të Italisë. Rama i preu në besë qytetarët dhe ambientalistët dhe i ka lënë që të gdhihen jashtë në gjithë këto netë dimri. Ky është një turp i madh”, u shpreh Kokëdhima.
Gjatë fjalës së tij ai tha se, nuk mund të vazhdojnë këto luftëra të paprincipta kundër njëri-tjetrit në parti, pasi vetëm puna, rezultatet, sjelljet dhe kontributet duhet të përcaktojnë ecurinë në karrierë.
