Ardian Narkaj, 52 vjeç, ka mbetur i plagosur gjatë një operacioni policor, ku morën pjesë edhe forcat RENEA, në zonën e Dukagjinit në Malësinë e Madhe.
Operacioni ishte organizuar pikërisht për kapjen e 52-vjeçarit, që ishte i dënuar me 21 vjet heqje lirie, me akuzën e vrasjes në rrethana cilësuese.
Dyshimet janë se mes tij dhe forcave të policisë ka pasur një shkëmbim zjarri, edhe pse zyrtarisht nga Policia e Shtetit, ende nuk ka një informacion lidhur me ngjarjen.
Nga raportimet mësohet se 52-vjeçarit i është kërkuar që të ndalojë, por ai ka qëlluar. Mësohet se ai ka mbetur i plagosur me tre plumba, një në këmbë, një në parakrah dhe një në gjoks. Dhe nëse kjo është e vërtetë, nuk dihet nëse plumbat janë qitur nga e njëjta armë, apo ka pasur të shtëna ngamë shumë se një efektiv policie.
52-vjeçari Narkaj është transportuar drejt spitalit të Shkodrës nga forcat e policisë dhe më pas për shkak të gjendjes së rëndë shëndetësore është transportuar me helikopter drejt Traumës. Burime spitalore shprehen se gjendja shëndetësore e të plagosurit është e stabilizuar, ai pritet t´i nënshtrohet ndërhyrjeve kirurgjikale, por ndodhet në rrezik për jetën, për shkak të plagëve me armë zjarri.
Kush është Ardian Narkaj?
Narkaj ishte në kërkim nga policia për vrasje të dyfishtë dhe policia kishte marrë informacion për vendndodhjen e tij në fshatin Bratosh të Malësisë së Madhe, teksa ka ndërmarrë një operacion për arrestimin, por me sa duket ka hasur në rezistencë dhe për pasojë mbeti i plagosur rëndë.
52-vjeçari ka qenë në listën e të kërkuarve nga Policia e Shtetit, pasi akuzohet për “vrasje në rrethana cilësuese”.
Ardian Narkaj është autori i një vrasjeje të dyfishtë të ndodhur në viti 2008 në Malësinë e Madhe. Ngjarja ndodhi në fshatin Bratosh, ku viktimë mbetën Tonin Ulaj dhe Gjergj Shota.
Krimi i dyfishtë ndodhi gjatë kohës kur dy viktimat ishin persona të shpallur në kërkim nga Policia. Një tjetër i kërkuar është Françesk Vala, i dënuar në vitin 2017.
