Juventusi e mbylli me fitoren testin e parë nën drejtimin e Maks Alegrit duke mundur 3-1 rivalët e Çezenës.
Alegri dhe pse me ekipin e cunguar, hodhi disa lojtarë nga ekipi i parë më fushë si Rugani, Mekeni apo Pjaca. Siparin e golave e hapi mbrojtësi i krahut, De Winter, i cili realizoi vetëm pas 5 minutash lojë.
Goli i dytë për Juven u shënua nga Mekeni në minutën e 34-të të takimit, ndërsa 2 minuta më vonë u bë protagonist një shqiptar. Sulmuesi 18-vjeçar i Çezenës, Kristian Shpendi shfrytëzoi saktësisht një top të lënë në mbrojtjen juventine për të ngushtuar rezultatin dhe për të shënuar emrin në tabelën e golashënuesve.
Në minutën e 66-të, Malvano realizoi dhe të tretin për Juven duke mbyllur pozitivisht këtë test të parë për skuadrën bardhezi nën drejtimin e Maks Alegrit.
