Detaje të reja nga arrestimi i biznesmenit Isuf Isufi, dje në Shkodër. 49-vjeçari u ndalua nga Policia, pasi iu gjet një armë zjarri pa leje në çantën e dorës. Bashkë me armën e zjarrit, në çantë iu gjetën dhe një sasi parash, të cilat u sekuestruan. Sipas raportimeve mediatike, bëhet fjalë për mbi 2.000 euro.
Burime zyrtare nga policia sqaruan se kanë marrë sinjalizim se biznesmeni lëvizte me armë pa leje dhe më pas kanë ndërhyrë, duke e ndaluar.
“Bazuar në informacionet e marra në rrugë operative se një person qarkullonte në qytet me armë zjarri me vete, shërbimet e Policisë të Forcës së Posaçme ‘Shqiponja’ në DVP Shkodër, në vendin e quajtur ‘Lagje Perash’, kanë ndaluar shtetasin Isuf Isufi, të cilit gjatë kontrollit i gjetën një armë zjarri pistoletë. Në përfundim të veprimeve të para hetimore të kryera nga specialistët e Hetimit të Krimit në Komisariatin e Policisë Shkodër u bë arrestimi në flagrancë i 49 vjeçarit, banues në lagjen Ajasëm, Shkodër, për veprën penale ‘Armëmbajtja pa leje’”, njoftoi policia.
Isuf Isufi, njihet si biznesmen në Shkodër, ndërkohë që disa vite me pare ka qenë edhe zv/president i Vllaznisë.
Sipas të dhënave të QKB, ai zotëron dy biznese, një me objekt aktiviteti “Tregti me shumice e pakice import eksport te artikujve medicinale, barna mjekesore, ilaçe. Magazinimi i tyre. Hapje farmacie. Tregtim me shumice e pakice import eksport te artikujve te ndryshem industriale ushqimore, hidrosanitare, ndertimi etj. Bar bufe, restorant, hotel” dhe tjetri me fushë veprimtarie “çerdhe, kopsht”.
Isuf Isufi është vëllai i Hasan Isufit, i cili në prill të vitit 2020, plagosi një shtetas pas një konflikti për pronën.
