I ftuar në edicionin e lajmeve të Ora News, ish-kandidati për kreun e PD-së, Fatbardh Kadilli, ka folur në lidhje me mbledhjen e Kuvendit Kombëtarë të kësaj force politike.
Ai është shprehur se Partia Demokratike, ka nevojë për ndryshim rrënjësorë, teksa shton se propozimet që ka bërë Basha, nuk do ndryshojnë asgjë.
Më tej ai shprehet se kjo forcë duhet të krijojë struktura të reja, teksa shton se PD është e pabashkuar dhe nuk arrin dot të mobilizojë dot të gjithë individët që ka prodhuar e djathta politike
“Sot ne jemi në opozitë për herë të tretë si mandat politik dhe kjo na vë përpara përgjegjësisë së madhe. Shqiptarët kërkuan nga ne një opozitë të re. Provuam dy herë me Zotin Basha të jetë një stil opozitar, diku më radikal, diku me negociator. Sot kur ne jemi si shoqëri e gjitha përballë pushtetit për herë të tretë me të njëjtin stil qeverisës, jemi të detyruar të japim përgjigje të reja, përgjigje kësaj situata. Projektet politike të Bashës, për mua ka qenë një projekt i shteruar, por ai rimori një konfirmim nga demokratët. Në këtë rast nuk është çështja kush është lider i PD, por si do të reagojë PD përballë kësaj shoqërie shqiptare, për një përgjigje të re politike, për një ofertë të re politike. Këtu fillon dhe ndahen opinionet që shkojnë deri në debate. Qëndrimi im është që PD ka nevojë për një organizim rrënjësor.
Basha bëri propozimet e tij për ndryshimet statutore të cilat janë të mira, nuk mund të them që kanë ndonjë negativitet në to, por nuk sjellin asnjë ndryshim. Ne nuk kemi një statut të keq, por ne kemi nevojë për një filozofi politike, dhe debati i sotëm për statut nuk u provokua nga un, nuk u provokua as nga demokratët, u provokua nga vetë thirrja e Kuvendit Kombëtar që është thirrja e Zotit Basha.
Në këtë Kuvend do bëhen analiza dhe ndryshime statutore nëse do të jetë e nevojshme. PD është e pabashkuar sepse nuk arrin dot sot të mobilizojë dot të gjithë individët që ka prodhuar e djathta politike, brenda PD apo rrotull saj, përfshi brenda vetes. Partia Demokratike e ka mbyllur një cikël 30-vjeçar, nuk është normale që në ditën që Zoti Basha shprehet se do filloj për herë të tretë një betejë për votën, në oborrin e PD të gjesh akoma thirrjet liri-demokraci dhe poshtë komunizmit. Kjo do të thotë se PD ka mbetur edhe në slogane e vjetër.
Sot Partia Demokratike, duhet të jetë antikorrupsion e jo anti-komunizëm. Kjo është partia që unë pres. Partitë politike për mua nuk janë statut, statuti është sekondar. Ajo që po ndodh sot në Kuvendin që ne do organizojmë është burokratizimi i politikës. Statuti duhet të krijoj mundësi për të gjithë. Propozimi im ka qenë shumë i qartë: Të vendosen primaret, kjo e bën PD më përfshirëse, domethënë me një anëtarë një votë, anëtarësia të zgjedh kandidatët për deputetë. Fleksibilitreti i strukturës, dhe ndarja e administrimit të Partisë nga udhëheqja e Partisë.”
