Ndryshe nga sa u tha fillimisht, autori i vrasjes së ambasadorit rus në Turqi nuk ishte përkrahës i Gulen. Polici turk, i cili vrau ambasadorin e Rusisë në Ankara, ka qenë 8 herë pjesë e ekipit të sigurisë që garantonte mbrojtjen e presidentit turk, Recep Tayyip Erdogan që prej muajit korrik, sipas shtypit.
Nën vëzhgimin e kamerave, Mevlut Mert Altintas, një polic 22-vjeçar, vrau me nëntë plumba ambasadorin e Rusisë në Ankara, Andrei Karlov, para se të vriste veten.
Sipas një gazetari të të përditshmes “Hurriyet”, polici, i cili shërbente në Ankara në forcat kundër trazirave që prej dy viteve e gjysmë, ka qenë anëtar në dispozitivin e sigurisë për mbrojtjen e presidentit turk, Erdogan për tetë herë që prej grushtit të munguar të shtetit në muajin korrik.
“Ai ka qenë anëtar i ekipit që garantonte sigurinë e presidentit pas truprojave”, shkruan Abdulkadir Selvi, një gazetar i afërt me pushtetin.
Sipas agjencisë zyrtare turke të lajmeve Anadolu Agency, që citon burime diplomatike, Mevlut Cavusoglu i konfirmoi John Kerryt se ”Turqia dhe Rusia e dinë që pas sulmit (…) është FETO”, akronim i rrjetit të Gulenit.
