Ish-drejtori i Përgjithshëm i Policisë së Shtetit, Artan Didi, mund të rikthehet sërish në detyrën që mbante. Burime të Lapsi.al thonë se ai është thirrur këto ditë nga ministri i Brendshëm, Saimir Tahiri dhe kryeministri Edi Rama, të cilët i kanë ofruar të drejtojë sërish Policinë e Shtetit.
Të njëjtat burime saktësojnë se shkak është bërë situata e rëndë e rendit dhe sigurisë në vend, në veçanti shpërthimi i kultivimit të kanabisit.
Artan Didi u largua nga detyra pas skandalit, me dy vartës direkt të tij, që kishin fshehur dokumentin e Interpolit belg, për arrestimin e deputetit Mark Frroku, i dënuar në Belgjikë për një vrasje të vitit 1999.
Pas largimit nga kjo detyrë, Didi u emërua në detyrën e oficerit të kontaktit në ambasadën shqiptare në SHBA.
Artan Didi u kthye nga Amerika në prag të zgjedhjeve të vitit 2013, duke i shërbyer Partisë Socialiste, e cila më pas me ardhjen në pushtet e shpërbleu në postin e Drejtorit të Përgjithshëm të Policisë së Shtetit.
Por edhe pasi u ngrit në krye të uniformave blu, ai nuk hoqi dorë nga militantizmi politik. Këtë e dëshmoi qartë fshehja e kërkesës belge për Mark Frrokun.
