Statuja e një gjenerali të Konfederatës Amerikane, që ishte në qendër të protestave të dhunshme në qytetin Sharllotsvill të SHBA-së, u hoq të shtunën. Statuja e gjeneralit Robert E. Lee dhe një tjetër e gjeneralit Thomas “Stoneëall” Jackson do të vendosen në depo.
Planet për të hequr statujën e Leesë kanë nxitur një tubim të nacionalistëve të bardhë në gusht të vitit 2017. Një protestuese kundër racizmit, Heather Heyer, është vrarë atëherë nga një neo-nazist. Vrasësi i saj është dënuar më vonë me burgim të përjetshëm.
Përkujtimet për Konfederatën pro skllavërisë, e cila ka përfshirë shtetet jugore që janë rebeluar kundër Qeverisë federale gjatë Luftës Civile në SHBA, kanë shkaktuar për kohë të gjatë polemika. Qindra statuja të Leesë, Jacksonit dhe figurave të tjera të famshme të Konfederatës ekzistojnë nëpër vende të ndryshme të SHBA-së.
Disa i shohin ato si shënjuese të historisë amerikane dhe kulturës jugore. Por, për të tjerët, ato shërbejnë si një kujtesë fyese e skllavërisë dhe shtypjes racore në SHBA. Marshimi “Bashkoni të Djathtën”, i mbajtur në Sharllotsvill të shtetit Virxhinia, ishte një nga tubimet më të mëdha të tilla dhe tërhoqi qindra neo-nazistë dhe nacionalistë të bardhë.
Dhjetëra njerëz u plagosën në dhunën që shpërtheu midis marshuesve dhe kundër-protestuesve. Sharllotsvill vazhdoi të bënte presion për heqjen e statujës së Leesë edhe pas protestave, por u parandalua të veprojë me akte ligjore dhe ndryshime në ligj.
Pastaj në prill, gjykata më e lartë e Virxhinias mori vendim që statuja mund të hiqet.
