Ndeshjet eliminatore të Shtatorit do të jenë tepër të rëndësishme për Shqipërinë në kuadër të synimit të madh për të luajtur shanset drejt një kualifikim në boteror.
Në këtë mënyrë, FSHF për të patur një fushë me kushte sa më të mira për kuqezinjtë ka nisur punën për shtrimin e tapetit të ri në “Air Albania.
Procesi i heqjes së tapetit të vjetër si dhe rregullimi i bazamentit zgjat nga shtatë deri në nëntë ditë dhe për këtë, një grup i posaçëm po punon intensivisht dhe me ritme të larta pune. Tapeti i ri që do të vendoset do të ketë në përbërjen e tij bar hibrid dhe bar natyral.
Në një prononcim të dhënë për fshf.org, administratori i stadiumit “Air Albania”, Kejdi Tomorri,është shprehur se pas heqjes së tapetit dhe rregullimit të bazamentit, do të vijojë puna për shtrimin e tapetit hibrid, duke theksuar se ky është një proces që do kohë, por që do të jetë gati për muajin shtator.
“Kemi filluar nga dita e djeshme heqjen e tapetit të vjetër, proces i cili sëbashku me rregullimin e bazamentit do të dojë një kohë nga shtatë deri në nëntë ditë. Më pas do të procedohet me instalimin e tapetit hibrid, i cili do të mbillet me farën e barit.
Normalisht është një proces që kërkon dy muaj kohë, por ne jemi duke i afruar proceset me njëra-tjetrën dhe besoj se në datën 5 shtator për ndeshjen e parë që Shqipëria do të luajë këtu ndaj Hungarisë, fusha do të jetë gati dhe në gjëndje optimale”, u shpreh Tomorri.
