Zbulohet një tjetër rast i tentativës për dhënie ndihmë për kalim të paligjshëm të kufirit, kundrejt fitimit, në Gjirokastër.
Është vënë në pranga një 23-vjeçar i cili u kap duke transportuar emigrantë të paligjshëm.
Po ashtu është sekuestruar një automjet dhe një aparat celular në zotërim të të riut, i cili po transportonte 6 emigrantë të paligjshëm.
”Nga shërbimet e Policisë Kufitare Kakavijë, në bashkëpunim me Seksionin për Hetimin e Trafiqeve në DVP Gjirokastër dhe shërbimet e FRONTEX-it, pas informacioneve të siguruara në rrugë operative u arrestua në flagrancë shtetasi R. Ç., 23 vjeç, banues në fshatin Lazarat, Gjirokastër. Shtetasi R. Ç. u kap në fshatin Lazarat, duke transportuar me automjetin tip ‘Audi’, 6 emigrantë të paligjshëm nga vendet e treta, në drejtim të Tiranës, kundrejt fitimit 250 euro për person. Gjithashtu, ky shtetas ka thyer masën e sigurisë “Arrest në shtëpi” të vendosur nga Gjykata, për veprën penale ‘Ndihma për kalim të paligjshëm të kufijve'”, njofton policia.
