Policia e Tiranës ka arrestuar një 26-vjeçar, pasi ka marrë pjesë në një sherr masiv të regjistruar në një nga qendrat e numërimit të votave për zgjedhjet e 25 prillit.
Policia bëri të ditur se është arrestuar A. S.(Z)., 26 vjeç. Ky i fundit ka marrë pjesë në sherrin e ndodhur ndjesa akuzohet për veprat penale “Shkelja e fshehtësisë së votimit” dhe “Kanosja apo dhunimi i pjesëmarrësve në zgjedhje”.
“Nga specialistët për Hetimin e Krimit në Komisariatin e Policisë Nr. 1 u bë ekzekutimi i masës së sigurisë “Arrest në burg” për shtetasin A. S.(Z)., 26 vjeç, për veprat penale “Shkelja e fshehtësisë së votimit” dhe “Kanosja apo dhunimi i pjesëmarrësve në zgjedhje”. Ky shtetas dyshohet se ka qenë i përfshirë në ngjarjen e datës 26.04.2021, në një qendër për numërimin e votave, ku ka ndodhur një konflikt mes vëzhguesve dhe numëruesit të votave,” thuhet në njoftimin e policisë.
Sherri masiv ndodhi rreth orës 22:45, të datës 26 prill, tek shkolla “1 Maji”, në VNV nr.30.
Në atë kohë policia njoftonte se me kërkesë të KZAZ-së, sherbimet e Policisë, me Vendim nr. 262, të KZAZ-së, kanë ndërhyrë në ambientet e brendshme të KZAZ-së ku po zhvillohet procesi i numërimit të votave, pasi kishte një konflikt mes vëzhguesve dhe numëruesit të votave.
Sherbimet e Policisë kanë ndërhyrë menjëherë dhe kanë bërë shoqërimin e 8 personave për veprime të mëtejshme hetimore.
