Nga Boldnews.al
Klosi është një nga qytezat më të varfra të Shëipërisë. Emigrim dhe migrim masiv, duke ulur ndjeshëm numrin e popullsisë. Fshatra të largëta dhe me infrastrukturë të dobët. Ndërtimi i rrugës së Arbrit mund t’i hapë sadopak sytë kësaj qyteze, e cila konsiderohet bashki sipas ndarjes territoriale të 2015-ës. Bashkia drejtohet nga Ilmi Hoxha, pas votimeve të 2019-ës, ndërsa të ardhurat kryesore janë nga puna në minierat e kromit, apo në fabrikën e pasurimit të kromit.
Por, pavarësisht se në çfarë gjendje janë banorët, të zgjedhurit e votimeve të 2019-ës, vijojnë që të bëjnë udhëtime qejfi në Shqipëri. Ata mezi kanë pritur që të lehtësohen masat dhe të organizojnë një udhëtim dy ditor në Pogradec dhe Korçë. Madje, Bashkia e Klosit dhe kryetari i saj, Ilmi Hoxha, kanë hapur një tender me objekt “vizita studimore të këshilltarëve”.
Fondi për këtë tender është rreth 4 milionë lekë të vjetra, ndërsa itinerari i rrugëtimit të 27 personave do të jetë Klos-Pogradec-Maliq-Korçë-Klos. Në dokumentet që ka siguruar BoldNeës janë të përfshira në çmim 2 suvenirë tradicionalë të zonës për dhurata, transporti me autobus komod, fjetja në hotel me 4 yje, ku të jenë të përfshira mëngjesi, dreka dhe darka. Madje, këshilltarët kanë kërkuar guidë dhe foto gjatë aktivitetit.
Ata kanë bërë edhe një plan, ku do të nisen nga Klosi në orën 05.00. Do ndalojnë për kafe gjatë rrugës, do të vizitojnë Bashkinë Pogradec dhe më pas argëtim dhe kohë e lirë për të konsumuar drekën. Më tej do shkojnë në Maliq dhe më pas në Korçë, me vizita te Katedralja, Bulevard, kulla Red dhe më pas në hotel me 4 yje. Në mbrëmje, darkë festive. Të nesërmen, sërish udhëtime në Pogradec për drekë dhe nisja për në Klos.
Nisur edhe nga itenerari, besoj se “studimet” e këshilltarëve të Matit do të jenë Për gastronomi dhe hoteleri. Të paktën do të kenë tema bisede për 1 muaj. Sa për popullin, do vijojnë që të punojnë në miniera.
