Çerekfinalet e evropianit dhuruan plot emocione, por dhe anë të veçanta për sa i përket statistikave. Në këtë pjesë vëmendja më e madhe shkoi te Anglia, e cila i mungonte gjysmëfinaleve prej 25 vitesh.
Por le ta nisim nga e para. Me fitoren 2-1 ndaj Belgjikës, Italia zgjeroi në 32 serinë e ndeshjeve pa humbje. Rekordi i përfaqësueseve mbahet nga Spanja dhe Brazili me 35. Megjithatë seria italiane është e jashtëzakonshme.
Rezultati i fundit negativ i të kaltërve daton 10 shtatorin e vitit 2018, 1-0, në “UEFA Nations League” kundër Portugalisë, kjo e fundit tashmë e shkurorëzuar si kampione e Evropës.
Edhe pse ndaj Zvicrës iu deshën njëmbëdhjetëmetërshat, Spanja shënoi gol në çerekfinale dhe aktualisht mbetet përfaqësuesja që ka shënuar më tepër këtë kompeticion, 12 herë. Por ajo është gjithashtu skuadra që ka shpërdoruar më shumë raste, 27 goditje në portë.
Në gjysmëfinale Spanja do jetë rivalja e Italisë dhe kjo do jetë hera e katërt në të katërtin evropian radhazi (2008, 2012, 2016, 2020) që ata përballen bashkë, një rivalitet i përsëritur si kurrë më parë. Suksesi 2-1 ndaj Çekisë i dhuroi Danimarkës gjysmëfinalet e Evropianit pas 29 vitesh mungesë.
Në vitin 2004 kishin qenë pikërisht çekët ata që ia mohuan këtë fazë, por këtë edicion danezët patën arsye për t’u hakmarrë. Kjo pasi ishte bërë shumë kohë që Danimarka nuk mbërrinte këtu dhe në fakt 29 vite, është periudha më e gjatë e mungesës së një përfaqësuese gjysmë-finaliste mes katër më të mirave të një kampionati tjetër evropian.
Duke fituar 4-0 ndaj Ukrainës, Anglia siguroi për herë të parë gjysmëfinalet e një evropiani që prej vitit 1996. Nga katër golat, tre u kryen me goditje me kokë, gjë që nuk kishte ndodhur kurrë më parë në një ndeshje evropiani. Për “Tre luanët” spikat statistika e 7 ndeshjeve radhazi pa pësuar gol.
Pesë prej këtyre ndeshjeve kanë qenë në këtë evropian dhe për këtë Anglia ka barazuar Spanjën e 2012-ës që e mbante këtë rekord, ndërsa si total janë 662 minuta ku portieri, Jordan Pikford ka qëndruar i pakalueshëm.
