Michael Ngoo pritet të jetë afrimi i radhës te Tirana. Sulmuesi anglez pëlqehet shumë nga stafi teknik i kryeqytetasve, si dhe nga drejtuesit bardheblu. Bisedimet kanë nisur prej kohësh dhe janë në fazë të avancuar.
Për këtë Newsport.al foli me presidentin Refik Halili, i cili konfirmoi tratativat me anglezin. Madje kreu i klubit bardheblu tregoi se gjasat janë që Ngoo të vijë së shpejti në Tiranë për të hedhur “të zezën mbi të bardhë”.
“Mund t’iu them që për Michaelin (Ngoo), jemi në bisedime prej ditësh. Ai do të vijë te Tirana dhe me 99 përqind do të bashkohet me ekipin tonë për sezonin e ri”, përfundoi shkurtimisht për Newsport.al, presidenti Halili.
Afrimi i Ngoo-së te 25-herë kampionët e Shqipërisë do të rriste ndjeshëm nivelin e fazës ofensive te skuadra e Tiranës. Shtatlarti është pranë firmës me kryeqytetasit dhe në edicionin e ri një dyshe Seferi – Ngoo, padyshim do të jetë rrezik konstant për çdo ekip kundërshtar.
28-vjeçari është njohje e vjetër e klubit bardheblu. Ai u aktivizua për 3 sezone me Tiranën duke arritur të lërë gjurmë në kampionatin shqiptar. Një nga sulmuesit më me potencial në vendin tonë që kontribuoi në rikthimin e titullit kampion pas 11 vitesh në ekipin kryeqytetas.
