Një krim i rëndë tronditi Greqinë në janar të këtij viti, ku në mes të Athinës u ekzekutua për një borxh shqiptari Edmond Llangozi.
Mediat greke raportojnë se autorët e kësaj ngjarjeje janë një shqiptar dhe një grek të dy të moshës 32-vjeçare. Ata janë arrestuar nga policia ndërsa raportohet se një person i tretë është i përfshirë në këtë vrasje dhe kishte rolin e vëzhguesit.
Kujtojmë se nga të shtënat me armë zjarri në lokal mbetën të plagosur rëndë edhe dy djemtë e Edmond Llangozi, Anxhelo dhe Mihal, 22 dhe 28 vjeç. Babai 54-vjeçar i dy fëmijëve u përpoq të mbronte djemtë e tij, doli përpara dhe u qëllua për vdekje. Nga hetimet e policisë në vendin fqinj ka rezultuar se shkak i ngjarjes ka qenë një borxh prej 600 eurosh.
Sipas Policisë, në kontekstin e hetimit, përfshirja e 32-vjeçarit nga Shqipëria u identifikua në një rast tjetër vrasjeje dhe rrëmbimi në tentativë kundër një të huaji 41-vjeçar, ngjarje e ndodhur në mars të vitit 2020 në Paleo Faliro.
