Oficeri i Lartë amerikan në Departamentin e Sigurisë së Brendshme, Alain Bersin, zhvilloi një takim në Tiranë me Drejtorin për Hetimin e Krimit të Organizuar dhe Krimet e Rënda, Ardian Çipa, si dhe drejtues të lartë të policisë.
Bersin ka garantuar policinë shqiptare për mbështetjen e SHBA-së në luftën kundër krimit dhe terrorizmit.
Ai nënvizoi se qëllimi i SHBA-së dhe Departamentit të Sigurisë është që, “Shqipëria të jetë vendi i parë që përfiton nga shkëmbimi dhe verifikimi i të dhënave biometrike duke patur kështu mundësinë të shfrytëzojë të dhënat e sistemit amerikan në një kohë shumë të shkurtër, në nivel operacional”.
Ai nënvizoi se për luftën kundër terrorizmit ka patur një shkëmbim shumë të mirë me zyrën në Shqipëri.
Nga ana tjetër drejtuesit e policisë shqiptare i kanë shprehur mirënjohjen dhe falenderimet për ndihmën dhe bashkëpunimin e Departamentit Amerikan përmes ICITAP, duke theksuar trajnimet e vazhdueshme për oficerët e Policisë Shqiptare dhe mbështetjen në sistemet e shkëmbimit të të dhënave biometrike, që ka përafruar teknologjinë bashkëkohore në punën e Policisë dhe ka sjellë rezultate në rritje, në finalizimin e shumë operacioneve.
