Kylian Mbappe i dha dje fitoren Zvicrës me penalltinë e humbur të tij, duke sigluar zhgënjimin më të madh në karrierën e tij, që në fakt sapo ka nisur. Sulmuesi goditi në të majtë, por Sommer e priti dhe vulosi eliminim e Francës, por njëkohësisht futi Mbappe në listën e humbësve të mëdhenj të penalltive.
Më poshtë kujtojmë disa nga penalltitë e humbura nga yje të mëdhenj. Zico, Platini, Maradona, Baggio, Beckham, Cristiano, Messi, të gjithë kanë humbur penallti aq të rëndësishme në karrierën e tyre.
Më 21 qershor 1986 Brazili dhe Franca ndesheshin në çerekfinalet e Kupës së Botës. Socrates, një nga yjet më të mëdhenj të Brazilit humbi penalltinë e tij. Më pas të njëjtën gjë e bëri ylli më i madh europian i asaj kohe, Michel Platini. Edhe Zico dhe Franca fitoi me shifrat 3-4 në total.
Më 30 qershor 1990 Argjentina ndeshej me ish-Jugosllavinë në Botëror, në çerekfinale. Ndeshja shkoi me penallti dhe Diego Maradona e humbi të tijën. E ka thënë vetë më pas se ishte një nga dështimet më të dhimbshme në karrierë. Fatmirësisht Argjentina fitoi 2-3, por e mundi Gjermania në finale.
Katër vite më pas në finalen e Botërorit, dy yje të futbollit italian dhe atij botëror, Franco Baresi dhe Roberto Baggio humbën penalltitë në finale dhe i dhuruan Botërorin Brazilit. Të paharrueshme! Në Euro 2004, Anglia dhe Portugalia u ndeshën në çerekfinale. U deshën penalltitë për të vendosur fituesin.
Ylli i Anglisë, David Beckham goditi mbi traversë dhe i dhuroi gjysmëfinalet Portugalisë, që do shkonte deri në finale dhe do mundej atje nga Greqia. Dy specialistë të 11-metërshave, Cristiano Ronaldo dhe Sergio Ramos kanë hyrë gjithashtu në listën e humbësve të mëdhenj të penalltive.
Në 2011-2012 kur Real Madrid ndeshej në gjysmëfinale te Champions me Bayern Munchen, ndeshja shkonte me penallti. Ronaldos ia priti Neuer, ndërsa Sergio Ramos bëri një nga goditjet më skandaloze në histori, me memet, që e “kërkojnë” ende atë top në Hënë.
As një nga më të mëdhenjtë e historisë, Lionel Messi nuk mund t’i mungonte kësaj liste. Më 27 qershor 2016, Argjentina dhe Kili ndesheshin në finalen e Copa America dhe 120 minutat u mbyllën në barazim. Messi gaboi dhe e humbi atë penallti, që edhe tani me siguri ia prish gjumin.
Tashmë në këtë listë yjesh hyn edhe Kylian Mbappe, i cili e futi në portë dje, por Sommer e ndali. Është vetëm 22 vjeç dhe do ketë kohë të shlyejë gabimin e tij. Është me fat sepse e ka nisur me triumfin në Kampionatin Botëror të vitit 2018. /abcnews.al
