Vdekja tragjike e 20-vjeçarit Musaen Zeneli pas sherrit dhe përplasjes me armë mes familjes Ferracaku dhe Gocaj, ka prekur zemrat e të gjithë shqiptarëve. I riu humbi jetën në ditën e parë të punës, e cila rezultoi edhe e fundit për të. Ai jetonte me të ëmën, ndërsa i ati i kishte ndërruar jetë disa kohë më parë. Ndërkohë ditën e sotme Shkodra i dha lamtumirën 20-vjeçarit fatkeq dhe ai u përcoll për në banesën e fundit.
Familja e tij ndodhet në kushte të vështira ekonomike dhe kjo gjë mesa duket e ka rritur ndjeshmërinë dhe dhembshurinë tek shqiptarët, të cilët janë shprehur të gatshëm të ndihmojnë financiarisht familjen e tij. Organizata USA ALBANIAN SOCIETY ka hapur një llogari për të ndihmuar famijen Zeneli dhe deri më tani janë mbledhur mbi 10.000 dollarë.
Musaen Zeneli humbi tragjikisht jetën dy ditë më parë, pak minuta pasi mbylli punën pas mesnate. Ai nuk u kthye kurrë në shtëpi, pasi aksidentalisht mori një plumb në zemër. Ai u gjet pa shenja jete në rërë ndërsa në xhep kishte disa qindarka të mbledhura nga bakshishi i pushuesve që morën çadra e shezllonë gjatë ditës. Musaeni la pas nënën dhe vëllain, Erdisin.
