Në fund të muajit gusht, Kryeministri Edi Rama pritet ë thërrasë një mbledhje të Asablesë Kombëtare të PS, ku do të paraqesë emrat e kabinetit të ri qeveritar, që do të votëbesohet në Parlament në shtator.
Gjithashtu mbledhja e Asamblesë së PS do të vendosë edhe se kush do e drejtojë Parlamentin në 4 vitet e ardhshme, pas dorëheqjes së Gramoz Ruçit nga të gjitha funksionet dhe tërheqjen nga politika.
Burime nga PS shprehen se mbledhja e Asamblesë pritet të jetë formale, pasi është e drejta e Kryeministrit të propozojë emrat për kabinetin e ri qeveritar.
Ashtu sikundër ka ndodhur deri më tani, Rama ka shmangur konsultimet në rradhët e socialistëve, dhe sipas asaj që është raportuar shpesh ministrat e emëruar, nuk kanë qenë në dijeni të detyrave të tyre të reja.
E njëjta praktikë pritet të ndiqet nga Rama edhe këtë rradhë, ndërsa diskutimet mund të përqëndrohen në atë se kush do të jetë Kryetari i ri i Kuvendit.
Në zgjedhjet e funbdit parlamentare, PS mori 74 mandate, pa përfshirë këtu 3 mandatet e PSD-së së Tom Doshit, që duket se do të jenë një suport për Kryeministrin. Në anën tjetër disa nga emrat e njohur në PS, si Pandeli Majko, Mimi Kodheli, Musa Ulqini, Anastas Angjeli, etj, nuk do të jenë pjesë e Kuvendit, pasi ose nuk u kandiduan ose u vendosën jashtë pjesës së sigurtë të listave të kandidatëve.
Kreu i Grupit Parlamentar të PS, Taulant Balla, gjatë një prononcimi shprehu bindjen se në qeverinë “Rama 3” do të ketë figura të reja.
“Është kryeministri ai që do të vijë me propozimet e tij konkrete, të cilat ato duhet dhe gjithmonë kanë bërë një ndërthurje mes eksperiencave të konsoliduara dhe kontributeve të reja për t’i dhënë qeverisë sa më shumë energji dhe sa më shumë grintë për të çuar më përpara një sërë reformash dhe për të startuar reforma të reja”, deklaroi ai.
Nuk dihet nëse Rama do të mund t´i besojë disa prej ministrave aktualë të vijojnë detyrat në poste ministrore, por javët e fundit ai është shprehur kritik dhe ka paralajmëruar ndryshime.
