Ndryshime në kupolën drejtuese të Policisë së Shtetit, përfshi të gjitha nivelet, nga shefa komisariatesh te drejtues qarqesh dhe në strukturat më të larta policore.
Është kjo ajo që pritet të ndodhë në ditët në vijim, gjë që u paralajmërua edhe nga Kryeministri Edi Rama një ditë më parë, para se të zhvillonte një takim urgjent me ministrin e Brendshëm, Bledi Çuçi, lidhur me atë që e cilësoi si reformimin e strukturës së Policisë së Shtetit.
Nga raportimet mësohet se e gjithë kupola e policisë mund të përfshihet nga ndryshimet, ndërsa nuk dihet nëse Kryeministri Edi Rama do të jetë i gatshëm të “dorëzojë” edhe kreun e këtij institucioni, Ardi Veliu, i emëruar në këtë detyrë nga ish-ministri i Brendshëm, Fatmir Xhafaj, por që qëndroi në detyrë edhe gjatë kohës kur ky institucion drejtohej nga Sandër Lleshaj dhe tani nga Bledi Çuçi.
Burimet bëjnë me dije se ky formatim ishte vendosur të bëhej në shtator-tetor, por duket se ngjarjet kriminale dhe gjendja e renditdhe sigurisë në vend, kanë detyruar Kryeministrin Rama që të ofrojë procesin.
Përgjatë viteve të fundit Policia e Shtetit është akuzuar shpeshherë si një strukturë e politizuar, e cila është vënë në shërbim të Rilindjes dhe veçanërisht Kryeministrit Edi Rama, gjë që duket i ka siguruar Ardi Veliut të qëndrojë në detyrë, edhe pse janë raportuar raporte institucionale aspak të mira me të paktën 1 nga ministrat e Brendshëm.
Burimet shprehen se ndryshimet që janë paralajmëruar synojnë jo thjesht largime emrash, por ndryshime strukturore dhe organizimi, që do të nisin nga nivelet e Komisariateve, më pas me Drejtoritë e Qarqeve, për të vijuar me Drejtoritë e Përgjithshme të Policisë së Shtetit.
Por pavarësisht asaj që mund të ndodhë me këto nivele, nëse Kryeministri do të vijojë të mbajë në detyrën e Kryepolicit Ardi Veliun, me shumë gjasa policia do të vijojë të funksionojë me të njëjtin mentalitet, kryesisht arrogancë dhe përdorim politik, sikundër ka ndodhur deri më tani.
Ndaj duket se përballë një bilanci lufte ku pothuajse çdo ditë raportohen jetë njerëzore të humbura nga krimet apo aksidentet rrugore, ku në 48 orët e fundit, të paktën 10 qytetarë kanë humbur jetën, 4 prej të cilëve i përkasin një familjeve, dhe 4 të tjerë u vranë pas një konflikti me armë për shezlongjet në Velipojë, çdo tentativë e Kryeministrit për reformim të Policisë, pa ndryshuar kreun e saj, është më shumë një show dhe propagandë.
