Pas masakrës së Velipojës ku 4 persona humbën jetën dhe dy të tjerë u plagosën, ka ardhur reagimi nga nënkryeministri Erion Braçe, i cili më shumë se i shqetësuar lidhur me ngjarjen, merret me qëndrimet opozitare, apo faktin se shteti duhet të marrë atë që i takon.
Por Braçe ka preferuar të shmangë satusin e kryeministrin Edi Rama me pamje nga Velipoja, i cili i uroi qytetarëve mirë mëngjes, duke mos pasur asnjë koment për ngjarjen tragjike në Velipojë.
Gjithashtu Braçe shmang përgjegjësitë e të paktën dy institucioneve, Agjensisë së Bregdetit dhe Ministrisë së Turizmit, që bazuar në kompetencat që kanë, japin lejet lidhur me shfrytëzimin e vijës bregdetare, nga bizneset që ushtrojnë aktivitetin. Pikërisht mungesa e ndarjes së hapësirës mes dy bizneseve që janë ngjitur për vendosjen e shezlongëve krijoi edhe përplasjen që shkaktoi 4 viktima.
Por duket se kjo ngjarje e rëndë po shërben si një indicie që shteti të marrë nën kontroll atë që i takon, sikundër shkruan Braçe, edhe pse nuk ka argument që mund të justifikojë sepse nuk e ka marrë deri më tani, kur partia ku militon nënkryeministri, ka 8 vite në pushtet.
Nëpërmjet një reagimi në rrjetin social, Braçe thekson se beteja me armët i përket institucioneve duke filluar nga Policia tek Prokuroria e Gjykata, ndërsa shton se ligjet janë aty, madje sipas tij edhe të ashpra.
Gjithashtu Braçe shprehet se prej 30 vitesh është thënë se privati e menaxhon më mirë atë që është e shtetit, por sipas tij e vetmja gjë që ka ndodhur është vetëm shkatërrim, ndërtime pa leje, çmime luksi duke u bërë zot me bregun e shtetit.
Tashmë thotë Braçe ka ardhur koha që shteti të marrë atë që i takon, atë që është publike për ta menaxhuar me mënyrën e vetme, duke i shërbyer qytetarëve kudo, si atyre vendas dhe qytetarëve të huaj.
Braçe nuk lë pa përmendur reagimet e kreut të PD Lulzim Basha dhe Presidentit të Republikës Ilir Meta, të cilat i ironizon duke u shprehur se janë pjesë e urrejtjes dhe grabitjes kombëtare dhe gjithçkaje publike, duke filluar në Qerret për të vazhduar më pas grabitjen sipas tij në Hamallaj dhe Lalëz.
