Ndërsa vendi është tronditur nga ngjarja e rëndë e cila ndodhi në Velipojë, pas mesnate, ku u vranë 4 persona, dhe u plagosën 2 të tjerë, Kryeministri vijon me postimet e tij në rrjetin social.
Rama përmes një foto në rrjetet sociale, shkruan: Mirëmëngjes nga Velipoja e dashur!
Duket se Kreu i Qeverisë ose nuk e ka marrë ende vesh ngjarjen e rëndë, ose ajo nuk i ka bërë përshtypje dhe vijon të promovojë turizmin. Dhe si për ironi ka postuar një foto me shezlongje, që ishin zanafilla e konfliktit mes pronarëve të dy bizneseve në Velipojë, që prodhoi më pas 4 viktima dhe 2 të plagosur.
Por komentet e shumta që shoqërojnë postimin, tregojnë jo vetëm frikën e qytetarëve, por edhe revoltën e tyre.
Pas masakrës me 4 të vrarë, dhjetra pushues, të tronditur nga ngjarja, kanë vendosur që të largohen dhe të lënë në mes pushimet e tyre.
Sherri për shezlongjet e plazhit prodhoi 4 viktima dhe dy të tjerë mbetën të plagosur.
Viktima nga plumbat e armës kanë ngelur Kujtim Ferracaku, Xhovani Gocaj, Edmond Gocaj dhe Myserim Zeneli, ndërsa plagosur kanë mbetur Hasan Ferracaku dhe Elmind Dyli, që dyshohet edhe se e kanë kryer aktin makabër.
Përplasja ka nisur fillimisht me fjalë mes viktimave, dhe më pas ka degjeneruar në përplasje armësh.
Kujtim Ferracaku është pronari i hotel “Fantazia” në Velipojë, dhe është konfiktuar me pronarët e lokalit “Gocaj”, ku kanë mbetur të vrarë nga 2 persona të secilës palë, ndërkohë që makthi i krismës së armëve duket se do të shoqërojnë për një kohë të gjatë të gjithë pushuesit që kanë qenë në Velipojë.
Kujtim Ferracaku, është babai i Arjan Ferracakut, i cili është vrarë po ashtu në një atentat në Shkodër, ndërsa Hasan Ferracaku që ka mbetur i plagosur është vëllai i tij.
