Policia e Shtetit përgjatë 12 orëve ka pezulluar 66 leje drejtimi dhe vendosi 2668 masa administrative për shkelje të Kodit Rrugor.
Ky është njoftimi i Policisë së Shteit, që ka ndërmarrë aksionin e patrullimeve rrugore, një ditë pas dy ngjarjeve tragjike me aksidente në Tiranë dhe në aksin rrugor Fier-Vlorë, ku humbën jetën 5 shtetas.
“Janë pezulluar 39 leje drejtimi, për shpejtësi mbi normat e lejuara, matur me radar, dhe 27 leje drejtimi për drejtim mjeti nën efektin e alkoolit; 473 masa administrative për përdorim të celularit gjatë drejtimit të mjetit, 397 masa për mospërdorim të rripit të sigurisë, 644 masa për shpejtësi mbi normat e lejura, manovra të rrezikshme në rrugë dhe mosrregullim shpejtësie, veçanërisht në qendrat e banuara, 194 masa për mospërdorim të kaskës mbrojtëse në mjetet me dy rrota, 778 masa për parakalime të gabuara dhe 182 masa për mosruajtje të largësisë së sigurisë mes mjeteve”, thuhet në njoftimin e policisë.
Një ditë pas aksidentit tragjik, ku 4 pjesëtarë të së njëjtës familje, mes të cilëve dy fëmijë të mitur, humbën jetën në aksin Fier-Vlorë, policia ka vendosur të zbarkojë në terren, në një operacion për të ndëshkuar shkelësit e rregullave të qarkullimit. Duket se ngjarja e rëndë e një dite më parë dhe reagimet e shumta mediatike dhe në rrjetet sociale kanë zgjuar nga gjumi edhe sektorin e qarkullimit rrugor në Policinë e Shtetit.
