Aktivisti Redon Meksi, në një lidhje të drejtëpërdrejtë me studion e lajmeve të televizionit “FaxNews” komentoi aksidentin e rëndë të Vlorës, ku ndërroi jetë e gjithë familja Gushi nga qyteti i Patosit.
Meksi u ndal fillimisht në kuadrin ligjor të dënimit të një vepre penale si pasojë e mosrespektimit të rregullave të qakullimit rrugor.
Sipas Meksit dënimi nga 5 deri në 20 vite burg nëse shkakton plagosjen ose vdekjen e një ose disa personave si pasojë e thyerjes së ‘Kodit Rrugor’ është një dënim i mjaftueshëm.
Në Shqipëri, sipas tij, problemi që shkakton dhe indinjatën në popullatë qëndron tek mosdhënia e drejtësisë për fëmijët e të pasurve, të cilët e blejnë gjykatën.
“Është një ngjarje shumë e rëndë. Unë në fakt bëra një shkrim të shkurtër për të treguar nenin përkatës që parashikon këtë vepër penale. Në rrjete sociale shumica e njerëzve kërkonin të dënohej personi për vrasje me dashje dhe vrasje me paramendim, që në fakt nuk është e tillë.
Neni 290 parashikon se shkelja e rregullave të qarkullimit rrugor, kur ka vepër penale dhe shkaktohet plagosja ose vdekja e një ose disa personave, dënohet nga 5 deri në 20 vjet. Në fakt është një dënim relativisht i lartë, 20-vjeçar në këtë rast, pasi kemi të bëjmë me vdekjen e 4 personave.
Ky nen, ky dënim është i mjaftueshëm po të respektohet si duhet. Indinjata te ne lind pasi është inati për mosdhënien e drejtësisë nga gjykatat ndaj një të pasuri që ka lekë babai.
Vetë djali me çfarë lexova sot është në procedim penal të njëjtë për plagosjen e një personi për mosrepektim të rregullave të qarkullimit, pra një rast i përsëritur që rëndon situatën e tij.
Për mua ky nen është në rregull, problemi qëndron tek masat paraprake që shteti nuk ka marrë, sidomos te patentat. Nuk duhet të merret patenta me një muaj, sidomos për një 18-vjeçar, plus kontrolli rrugor i munguar me radar si dhe respektimi i heqjes së patentës në rast të shkeljes“, tha Meksi.
