Kryeministri Edi Rama ka dhënë një tjetër mesazh në drejtim të Dritan Lelit, Kryebashkiakut të Vlorës, i cili duket se qëndron formalisht në detyrë. Kreu i Qeverisë, i cili ka zgjedhur të përfaqësojë Durrësit në legjislaturën e ardhshme parlamentare, duke hequr dorë nga mandati i Vlorës, sot ka inspektuar Parkun e Shtëpisë së Pavarësisë dhe infrastrukturën lidhëse të Transballkanikes me zonën e portit.
Rama u shfaq në krah të Damian Gjiknurit, drejtuesi politik i Rilindjes për Vlorën, dhe zv/kryetarit të Bashkisë, Afrim Qendro, duke shmangur Dritan Lelin, i cili prej javësh ndodhet nën breshërinë e sulmeve të Rilindjes.
I rrethuar nga të paktën 6 truproja, Rama ka dëgjuar shpjegimet e Qendros lidhur me projektet, edhe pse zyrtarisht në zyrën e Kreut të Bashkisë është Dritan Leli. Ky i fundit duket se përfundimisht ndodhet në listën e personave të padëshiruar të Kryeministrit, që me sa duket ka bërë zgjedhjen e tij, lidhur me Vlorën.
Përplasja mes kryeministrit dhe kryebashkiakut Dritan Leli, nisi kur ky refuzoi që të hiqte dorë nga mandati i kryebashkiakut e të kandidonte për deputet në një vend jo të sigurt të listët së PS. Gjatë fushatës, Rama e quajti kryebashkiakun e Vlorës “të vdekur për ne”, duke e shmangur më pas nga të gjitha aktivitetet e tij dhe të PS-së.
Ndërkohë menjëherë pas zgjedhjeve të 25 prillit ka nisur edhe “hakmarrja” e Ramës ndaj Lelit, duke tentuar që ti bëjnë një “gjyq publik” në mbledhjen e Këshillit Bashkiak.
Prej një muaji, kryetarja e Këshillit Bashkiak ka kërkuar mbledhjen e Këshillit Bashkiak për të zhvilluar seanca dëgjimore me kryetarin e Bashkisë Dritan Leli. Ata pretendojnë se në qarkun e Vlorës mungojnë investimet në infrastrukturë dhe se Bashkia nuk ka marrë masat për të përballuar sezonin turistik. Por pavarësisht këmbënguljes së tyre, deri më tani kryebashkiaku e ka shmangur një “gjyq publik”.
Herën e parë që ndodhi para dy javësh, Leli nuk lejoi që mbledhja e Këshillit Bashkiak të bëhej me prani fizike. Ai kërkoi që mbledhja të zhvillohej online, ndërsa mbylli edhe derën e teatrit duke u bërë pengesë edhe për pjesën tjetër të Këshillit Bashkiak.
Mbledhja e Këshillit Bashkiak ka dështuar edhe dy herë të tjera, ndërsa ende insistohet që të mblidhen. Por, teksa kryebashkiaku Dritan Leli akuzohet nga kolegët e tij në Vlorë se nuk ka marrë masat dhe nuk ka bërë investime për pastrimin e qytetit, vërehet një vëmendje e shtuar e ndërkombëtarëve te Bashkia e Vlorës.
Në kohën që Këshilli Bashkiak kërkonte seancë dëgjimore me qytetarin e parë të Vlorës, ky i fundit inspektoi punimet në vend-trajtimin e mbetjeve në Bashkinë e Vlorës së bashku me ambasadorin e Gjermanisë, Peter Zingraf.