Kontratat 1-vjeçare janë bërë shpesh problem për klubet e ndryshme të Superiores. Edhe pse mund të kenë investuar shumë për lojtarë të ndryshëm, në fund ata që kanë dalë të fituar kanë qenë vetëm lojtarët. Rasti konkret dhe më i freskët në elitën tonë të futbollit është klubi i Partizanit.
Që pas ngjitjes në elitë, kryeqytetasit kanë pasur shumë “hyrje-dalje”. Megjithatë pjesa menaxheriale ka lënë për të dëshiruar. Në një analizë të shkurtër rezulton që nga Partizani është larguar një formacion i plotë me parametra 0. Lojtarë që në elitën tonë kanë bërë apo do të bënin ende diferencën.
Nga porta e nisim me Mario Dajsinanin, portierin e cilësuar si talent që do t’i vlente shumë për të ardhmen. Ai u largua drejt Skënderbeut pasi nuk pranoi të rinovonte.
Mbrojtja e kuqe nis nga dy lojtarë të cilët kanë bërë diferencën asokohe te kryeqytetasit. Në linjën e djathtë të mbrojtjes, Arbnor Fejzullahi i dha fund aventurës në Tiranë mes shumë polemikave. Në qendër të prapavijës kujtojmë Amir Rrahmanin, qendërmbrojtësin e përfaqësueses së Kosovës që sot luan në Seria A. Edhe nga shtatlarti Partizani nuk arriti të përfitonte asgjë. E njëjta histori edhe me Sodiq Atandën, i cilësuar si “stoperi” më i mirë në vendin tonë. Afrikani nuk pranoi të zgjaste bashkëpunimin dhe u largua nga Shqipëria. E për t’iu rikthyer “vesit” të vjetër, Esin Hakaj bën që ngjarjet të duken si “deja-vu” në kampin e kuq. Ai është pranë transferimit në Turqi dhe Partizani nuk do të përfitojë sërish asgjë.
Për të kaluar në repartin e mesfushës, emrat që janë të shumtë. Megjithatë vlen të përmendim Bruno Telushin, “ushtarin” vlonjat që çdo ekip në Superiore do të donte ta kishte në organikë. Ai u largua te Kukësi e më pas jashtë vendit. E njëjtë gjë dhe me Idi Bathën, që në prapaskenë, nuk u respektua siç i kishte hije një kapiteni. Ai u transferua në Vlorë, për të mbajtur më pas shiritin e kapitenit te Tirana. Së fundmi, Rron Broja i dha lamtumirën të kuqve, pas një sezoni fantastik nën urdhrat e Ilir Dajës. Destinacioni i ri pritet të jetë Hungaria, por sërish për Partizanin nuk ka asnjë të ardhur.
Në linjën e majtë të sulmit dikur rreshtohej, Agustin Torasa. Shtatshkurtri argjentinas, ndër më të mirët në vendin tonë, nuk pranoi të rinovonte me të kuqtë pas dy sezoneve fantastike. Kryeqytetasit e promovuan në arenën europiane, mirëpo sa i përket financave, sërish asnjë përfitim. Po ashtu ndodhi dhe me Jasir Asanin, i cili erdhi nga Maqedonia e Veriut si një futbollist i lirë. Madje në shtetin fqinj, asnjë skuadër nuk e preferonte në organikë, ndërsa te Partizani iu dha menjëherë mundësia të tregonte vlerat e tij. Shkëlqeu me të kuqtë dhe ishte pikërisht lojtari i duhur për të mbushur arkat e klubit.
Por, mëngjërashi priti sa t’i përfundonte kontrata duke u larguar si bashkëlojtarët e sipërmendur. E për ta përmbyllur këtë histori të trishte, me probleme të theksuara menaxheriale te Partizani, është pikërisht Erald Çinari. Sulmuesi shkodran qëndroi pushim gjysmë sezoni për shkak të një dënimi nga ana e FIFA-s. Por, me të përfunduar penalizimi drejtuesit në bashkëpunim me stafin teknik i dha terren në fushën e blertë për të treguar cilësitë e tij. E pikërisht këto vlera e ndihmuan në aspektin individual, ndërsa për klubin e Partizanit ishte prap një investim i gabuar.
Vlen të theksohet se të gjithë lojtarët e përmendur janë aktivë në futboll dhe shumë prej tyre në kulmin e karrierës. Në Shqipëri kontratat afat-shkurtra janë problem serioz. Si në rastin “Partizani” që investon, kontribuon dhe promovon shumë lojtarë, të cilët e përdorin e ekipin e kuq si trampolinë për karrierën e tyre në arenën europiane. /Newsport.al/
FORMACIONI I LOJTAREVE TË LARGUAR:
Dajsinani; Fejzullahi – Rrahmani – Atanda – Hakaj; Telushi – Batha – Broja; Torasa – Çinari – Asani
