“Jetimorja nuk pranon fëmijën e një nëne të sëmurë mendore, të cilit nuk i dihet as atësia. Nuk mbaron me kaq nëna e vajzës kërkon strehë për vajzën e sëmurë mendore por askush si jep zgjidhje as për këtë”.
Kështu shkruan Ervin Salianji, sekretari për aksionin qytetar në PD, i cili ka parë nga afër gjendjen skandaloze ku jetojnë nënë e bijë dhe foshnja.
“Qeveria po lufton të varfërit jo varfërinë! Rasti i Vjollca Koritarit që jeton me 30 mijë lekë në muaj në një shtëpi që po rrëzohet, ndërsa duhet të mbikëqyrë një vajzë të sëmurë mendore e cila është jashtë kontrollit është një nga ilustrimet më të plota ku kalojnë në provë të gjitha institucionet që nuk funksionojnë në Shqipëri. Vajza e sëmurë 24 vjeç, të cilën nëna as mundet ta mbajë nën kontroll për shkak se ilaçet e domosdoshme nuk i përballon dot me asistencën, tashmë ka lindur një fëmijë babai i të cilit nuk dihet. Nëna e vajzës tashmë po bën një betejë të dytë. Beteja e parë ishte kur kërkoi që e bija e sëmurë të strehohej në një qendër, askush nuk e mori.
Sot ndërsa përballon mjerimin dhe sëmundjen mendore, prej 16 ditësh bën betejën që një jetimore të pranojë fëmijën e porsalindur”, shkruan Salianji.
Në rrëfimin e saj, gruaja ndërsa të tregon se si ka trokitur në çdo derë në atë të ministrisë, të bashkisë, të spitaleve, i është drejtuar mediave, thekson dhimbshëm se fëmija i porsalindur është normal dhe duket normal e duhet shpëtuar.
“Për 16 ditë me rradhë i porsalinduri lihet në të ftohtë, pa ushqim në një shtëpi ku s’mund të banohet dhe pa energji. Deri sot gjithçka që ka marrë kjo nënë e gjyshe në mjerim, është kërcënimi dhe hakërrimi pse ajo po e bën faktin publik në media. Rrëfimi i saj është dëshmia dhe prova e plotë se si asnjë institucion i vetëm nuk funksionon në këtë vend; veç bankës private që i mban 2 mijë lekë komision nga asistenca 30 mijë lekëshe”, shkruan Salianji.
