Djali i ish-kryeministrit Fatos Nano, Sokol Nano rrëfen për News 24 se çfarë ndodhi në lokalin që ai administron në Bllok, pasi policia shpërndau një njoftim se është proceduar penalisht e SHÇBA nisi një hetim për policët.
Me anë të një komunikimi telefonik në News 24, Nano pranon vetëm faktin se lokali që administron në Bllok ka qenë pjesë e kontrollit të policisë për drogë, por pasi kanë kontrolluar shumë klientë, policët janë larguar, shkruan BalkanWeb. Ai thotë se blutë e kryeqytetit kanë hyrë befasisht në lokal dhe nuk kanë paraqitur asnjë mandat, por mohon të jetë proceduar penalisht.
Si ka qenë mbërritja e forcave të policisë gjatë aksionit kundër shpërndarjes së drogës në lokalet e natës? A kanë patur ata një mandat në momentin që janë paraqitur në lokalin tuaj?
Sokol Nano: Jo nuk kanë patur mandat, por nuk besoj që ju duhet mandat për të bërë atë lloj kontrolli.
Duke qenë se bëhet fjalë për një operacion të koduar, besohet të paktën nga ekspertët, se forcat e policisë duhet të ishin të pajisur me mandat për të mësyrë në lokal, për të kontrolluar…
Sokol Nano: Nuk jam ekspert, nuk mund të flas për këtë, por mandat nuk kishin…
Po thoni që ishin pa mandat në momentin kur hynë për kontroll në lokalin tuaj?
Sokol Nano: Po, pa mandat ishin
Çfarë iu është komunikuar në momentin që kanë mbërritur në lokalin tuaj?
Sokol Nano: Nuk kanë komunikuar, kanë hyrë dhe kanë kontrolluar shumë klientë për drogë. Është një operacion që u bë në shumë lokale në Bllok. Kanë kontrolluar ambientet, pasi nuk kanë gjetur gjë janë larguar.
Ka pasur ndonjë tjetër procedim penal ndaj jush me pretendimin e mos pajisjes me kupon tatimor?
Sokol Nano: Jo, sepse policia nuk mund të bëjë procedim penal për kuponin tatimor, sepse duhet të jetë administrata tatimore. Atë natë nuk kanë kontrolluar fare për kuponin tatimor, thjesht kanë kontrolluar klientët, disa nga ambientet aty dhe janë larguar…
Kur kanë ikur, kanë lënë ndonjë procesverbal për kontrollin e ushtruar ndaj jush?
Sokol Nano: As procesverbal, asgjë..
Ju keni bërë ndonjë kërkesë për këtë kontroll?
Sokol Nano: Jo nuk kemi bërë ankesë, se normalisht është një aksion që e kanë bërë kudo në të gjitha lokalet e natës, Në dijeninë time policia e ka të drejtën të hyjë nëse ka sinjalizime. E rëndësishme është që neve s’na është paraqitur ndonjë mandat.
Keni pretendime për tejkalim të kompetencave të forcave policore në ushtrimin e detyrës gjatë kontrollit?
Sokol Nano: Nuk kam pretendime të tilla, megjithatë sot në media ka dalë një lajm që unë jam proceduar penalisht, por nuk është i vërtetë mua nuk më ka thirrur askush.
