Kryeministri Edi Rama nuk heq dorë nga makinat super luksoze ato “Jaguar”. Në mbledhjen e sotme të Këshillit të Minitrave qeveria ka rikthyer në vëmendje marrjen me qira të makinave të cilat do të jenë në dispozicion të ministrave dhe vet kreut të qeverisë. Për procedurën e marrjes me qira të makinave “Jaguar”, kryeministri ka shfuqizuar vendim në mbledhjen e sotme të Këshillit të Ministrave dhe i ka kaluar si kompetencë Ministrisë së Brendshme të drejtuar nga Saimir Tahiri, duke ja hequr Gardës së Republikës.
Vendimi për marrjen e makinave “Jaguar” për zyrtarët e lartë u kritikuar nga opozita si vendimi korruptiv, pasi bëhet për të përfituar njerëz të afërt me qeverinë.
Dhe vendimi i marrë në mars të vitit 2015 parashikon marrjen e 44 makinave me qira, nga të cilat, 8 për kryeministrin, 14 për Këshillin e Ministrave, 4 për kryetarin e Kuvendit, 2 për presidentin dhe nga një për 16 ministri të tjera të linjës.
Njoftimi i Qeverisë:
SHFUQIZIMIN E VENDIMIT NR.246, DATË 19.3.2015, TË KËSHILLIT TË MINISTRAVE, “PËR NGARKIMIN E GARDËS SË REPUBLIKËS SË SHQIPËRISË PËR KRYERJEN E PROCEDURËS SË PROKURIMIT PËR MARRJEN ME QIRA FINANCIARE TË AUTOMJETEVE NË DISPOZICION TË DISA FUNKSIONARËVE PUBLIKË DHE KRYEMINISTRISË”
Në mbështetje të nenit 100 të Kushtetutës dhe të nenit 113, të ligjit nr.44/2015, “Kodi i Procedurave Administrative i Republikës së Shqipërisë”, me propozimin e ministrit të Punëve të Brendshme, Këshilli i Ministrave
VENDOSI:
1. Shfuqizimin e vendimit nr.246, datë 19.3.2015, të Këshillit të Ministrave “Për ngarkimin e Gardës së Republikës së Shqipërisë për kryerjen e procedurës së prokurimit për marrjen me qira financiare të automjeteve në dispozicion të disa funksionarëve publikë dhe Kryeministrisë”.
2. Ngarkohen Ministria e Punëve të Brendshme dhe Garda e Republikës së Shqipërisë për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
