Besnik Sadikaj, 45 vjeç, është ekstraduar drejt vendin tonë nga Greqia, konfirmoi këtë të Enjte Policia e Shtetit.
Sadikaj është arrestuar nga autoritetet policore italiane, me qëllim ekstradimin Athinës e më pas drejt Shqipërisë, pasi ka qenë i shpallur në kërkim nga Interpol Athina për pengmarrje dhe nga Interpol Tirana për pastrim të produkteve të veprës penale ose të veprimtarisë kriminale.
Gjykata e Rrethit Gjyqësor Elbasan, në vitin 2014, e ka dënuar me 7 vjet heqje lirie në mungesë, për veprën penale “Pastrimi i produktit të veprës penale ose veprimtarisë kriminale”, pasi gjatë periudhës 2009-2010, ky shtetas ka hapur disa llogari në banka të nivelit të dytë në Shqipëri, në shuma të konsiderueshme në euro, të ardhura të cilat nuk janë justifikuar me burime të ligjshme.
Gjithashtu, ky shtetas dhe disa të tjerë janë dënuar në shtetin grek, pasi në bashkëpunim dyshohen për marrjen peng të një shtetaseje greke, në këmbim të shumës 1.800.000 euro.
Dyshohet se pjesë të parave që 45-vjeçari i ka përftuar nga pengmarrja, i ka depozitar në banka shqiptare.
Sipas gjykatës, ai ka depozituar gjithsej 110 000 Euro në katër depozitime në banka të ndryshme në Shqipëri. Para që disa dit përpara fillimit të hetimeve në ngarkim të tij, i pandehuri i ka tërhequr.
