Prej disa javësh, Kryeministri Edi Rama duket se po inskenon çdo skenar për të larguar Dritan Lelin si Kryebashkiak i Vlorës.
Nga momenti kur Leli refuzoi të ishte njvri prej kandidatëve për deputet të PS në këtë qark, duket se presionet ndaj tij, janë shtuar. Fillimisht përmes strukturave lokale të PS, më pas me disa prej kandidatëve për deputet dhe së fundmi me anëtarët e Këshillit Bashkiak, Rama po ushtron presion ndaj Kryebashkiakut, me synim ndoshta dorëheqjen e tij.
Deri më tani Leli ka mundur të rezistojë, ka shmangur një gjyq publik të përgatitur nga Rilindja, me pretendimin e zvarritjes së punëve publike në qytet, por nuk dihet edhe sa kohë Kryebashkiaku i Vlorës mund të qëndrojë në detyrë.
E ndërsa Kryeministri Rama, apo çdo zyrtar tjetër i Rilindjes ka shmangur kontaktet dhe shfaqjet në publik me Lelin, e anashkalojnë dhe ai nuk është pjesë e takimeve, ambasadori gjerman Peter Zingraf, e ka kthyer në jetën publike, përmes një takimi, në kuadër të bashkëpunimit gjermano-shqiptar në Vlorë, Himarë dhe Sarandë.
Ambasada gjermane në Tiranë bën me dije se ata vizituan sot impiantin e vjetër të depozitimit të mbetjeve dhe progresin e bërë në kantierin e ndërtimit të impjanit të ri.
Ambasadori Zingraf u shpreh se “mbrojtja e mjedisit dhe klimës janë në mbarë botën sfidat kryesore të kohës sonë. Gjermania mbështet Shqipërinë në projekte të rëndësishme, nga të cilat do të përfitojnë në fund të fundit qytetaret dhe qytetarët e saj, por edhe industria e qëndrueshme e turizmit”.
Nuk dihet nëse ky takim i Lelit me ambasadorin Zingraf mund të rehabilitojë figurën e tij në rradhët e Rilindjes, apo nëse kjo e fundit do të ndërpresë presionet ndaj Kryebashkiakut që dikur u vendos nga Rama si i pari i qytetit të Vlorës, ndërsa sot është armiku i rradhës.
