Aksionet për ndalimin e ndërtimeve pa leje, kanë vijuar këtë herë në Mat, ku janë proceduar penalisht kryeinspektori dhe dy ish punonjës të Inspektoriatit Vendor të Mbrojtjes së Territorit, pasi po lejonin të kryheshin ndërtime pa leje në zonën pranë tyre.
Mësohet se janë nën hetim penal kryeinspektori pranë Inspektoriatit Vendor të Mbrojtjes së Territorit në Klos, Miklel Velsula, 32-vjeç dhe dy ish-Inspektor, pranë IVMT, Fatmir Selaj, 39-vjeç ish-kryeinspektor dhe Kadri Dema, 28-vjeç, ish/inspektor.
Procedimi penal ndaj tyre ka nisur pasi dyshohet se kanë konsumuar elemente të veprës penale “Shpërdorimi i detyrës”, pasi duke mos kryer detyrat e tyre funksionale për inspektimin dhe mbrojtjen e territorit nga ndërtimet e kundërligjshme, kanë lejuar që të kryhen ndërtime pa leje në territorin e Bashkisë Klos.
Materialet procedurale në ngarkim të shtetasve të lartëpërmendur i janë referuar Prokurorisë për veprime të mëtejshme.
