Presidenti i Filipineve Rodrigo Duterte vazhdon luftën kundër drogës duke vrarë deri tani 5900 persona në 5 muaj që kur ai erdhi në krye të shtetit.
Lideri radikal insiston se ai nuk është vrasës, pavarësisht se rrugët e vendit janë mbushur me trupa të vdekur për shkak të politikës së tij të ashpër kundrejt përdoruesve dhe trafikantëve të drogës.
Presidenti Duterte tha se me kënaqësi do t’i lejonte njerëzit të festonin Krishtlindjet dhe Vitin e Ri në paqe nëse ata do ndalonin të merreshin me drogë. “Janë kryer shumë vrasje dhe ekzekutime. Doni që çdo gjë të përfundojë? Është e thjeshtë. Ndalni përdorimin e drogës. Ndaloni atë që të kalojmë Krishtlindje dhe Vit të Ri në paqe”, tha ai në deklaratë për mediat.
Policia kombëtare raportoi se deri tani janë kryer 5927 ekzekutime ndaj personave që kanë pasur lidhje me drogën, që nga 1 korriku i këtij viti. Një nga pikat kryesore të politikës së Duterte kur ai erdhi në pushtet në maj, ishte pikërisht lufta ndaj drogës, pra ishte një gjë e paralajmëruar.
Në korrik rreth 60 mijë të varur pas drogës në Filipine u dorëzuan përpara qeverisë pas urdhrave të Presidentit për të vrarë çdo përdorues ose shpërndarës droge.
