Edhe pse më në fund, erdhi zyrtarizimi i parë nga klubi i Partizanit, ende situata mbetet e paqartë në kampin e kuq. Emiliano Musta zgjodhi të ishte “dem,”, ndërsa po sot zyrtarizoi divorcin Eneo Bitri.
Burime të besueshme pranë klubit tregojnë se edhe me Egzon Belicën ka një ngërç në rinovimin e kontratës. Drejtuesit i kanë kërkuar shtatlartit të prapavijës t’i ulin rrogën, një kërkesë e çuditshme që ka lënë shije të hidhur te vetë lojtari.
Në këto kushte, 30-vjeçari strugan po shqyrton mundësinë për t’u larguar. Ai u ka premtuar drejtuesve se do të jetë pjesë e Partizanit vetëm për Kupat e Europës, por nëse oferta mbetet e njëjta, destinacioni i tij s’do të jetë më kryeqyteti.
Një situatë e zymtë kjo në klubin e Partizanit që ende nuk e ka plotësuar organikën. Zhvillime të reja priten në vazhdim për të ardhmen e Belicës teksa ende s’ka një marrëveshje mes tij dhe drejtuesve kryeqytetas.
