Ish-deputeti i PD, Arben Imami, ka folur mbrëmjen e sotme për zgjedhjet që u zhvilluan në Partinë Demokratike, ku Lulzim Basha u rikonfirmua kryetar me 81 % të votave.
Imami tha se fitorja e Lulzim Bashës ishte pa lavdi, pasi pretendon se nuk u bë një garë e ndershme, e barabartë dhe e drejtë.
Ai deklaroi në emisionin “Të Paekspozuarit” të Ylli Rakipit se Basha nuk duhej të kandidonte sërish për kryetar të PD pas humbjeve të thella në zgjedhjet parlamentare.
“Janë fitore pa lavdi. Nuk u bë një garë e ndershme, e barabartë dhe e drejtë. Bile ka edhe parregullsi që janë faktuar, po faktohen dhe do faktohen. Ai rezultat aq tepër sado të gërmojnë kandidatët e tjerë është i pakthyeshëm.
Ka patur parregullsi. Një palë zgjedhje të një kryetari që ka humbur tre palë zgjedhje, nuk janë zgjedhje. Pyetja është a duhej të kandidonte sërish Lulzim Basha? Kjo është çështja”, theksoi ish-deputeti.
