Pas videomesazhit të ministres së Arsimit Evish Kushi ku deklaroi se është marrë vendimi për uljen e kufirit minimal të pikëve për çdo notë të provimit të matematikës maturantët shprehen skeptikë dhe të vendosur për të vijuar protestat pasi sipas tyre nuk ka akoma diçka konkrete.
Maturantët kanë qenë në protesta të vazhdueshme në të gjitha qarqet e vendit lidhur me vështirësinë e provimit të matematikës, dhe sot në ditën e tretë ata vijojnë me qëndrimin e tyre për të bojkotuar provimin e lëndës me zgjedhje.
Të intervistuar nga gazetarja e Fax News, maturantët para ministrisë së Arsimit në Tiranë thanë se kanë akoma pakënaqësi dhe ministrja duhet të qartësojë deklaratën e saj.
“Ne jemi akoma të pakënaqur dhe kërkojmë që ministrja të qartësojë deklaratën që dha sepse na duket tallje dhe mospërfillje sepse është dita e 3 e protestës dhe akoma nuk tregon konkretisht se sa pikë ka ulur. Duam të bojkotojmë provimin sepse duam të kapim një shkollë të mirë. Ai provim ose do jetë i pavlefshëm, ose do anulohet si test sepse ishte nivel shumë i lartë dhe jashtë atyre që kemi mësuar në 3 vite.”
Pyetjes së gazetares se a do e kryejnë provimin me zgjedhje ditën e nesërme, maturantët u shprehën të vendosur për të vijuar protestën deri në momentin që ministria do nxirrte numrin e saktë të pikëve të ulura.
“Ne do dalim edhe sot sërish në orë 5 të pasdites dhe do vijojmë sepse nuk po luftojmë për një gjashtë, duam një tabelë konkrete dhe një përfaqësues të ministrisë ku do i përcjellim të gjitha kërkesat tona pasi nuk është vetëm kjo. Duhej të ishin marrë masa para se të ndodhte kjo, që në momentin që kemi marrë tezën në dorë.”
