Prova e parë dhe më e rëndësishmja kalon me sukses për Anglinë. Një nga ekipet që shihet si një nga pretendentët e Kampionatit Europian, debutoi me fitore minimale 1-0 ndaj Kroacisë të luajtur në “Wembley” me një numër të kufizuar tifozësh.
Për t’u vlerësuar ishte momenti prekës përpara ndeshjes ku i gjithë “Wembley” u ngrit në këmbë për të bërë një homazh për Christian Eriksen, ish benjaminin e Tottenham i cili dje kaloi proven më të madhe të jetës.
Pjesa e parë ishte e qetë dhe e kujdesshme nga të dyja skuadrat ku herë Sterling e herë Perisiç provuan të godisnin kuadratin por pa sukses.
Me një pjesë të parë të ekuilibruar, fraksioni i dytë është më kërkues për Anglinë që ngre presionin më lart dhe tenton më shumë nga krahët.
Në 56’ vjen dhe goli i avantazhit për “Tre Luanët” që nga e djathta me një pasim të Philips, shërbehet Sterling në zonë dhe me shumë vështirësi sulmuesi thyen Livakoviç.
Pesë minuta më pas është sërish Anglia nga krahu i majtë kësaj radhe ku një krosim i Mount për Kane, topi kalon shumë pranë shtyllës.
Kroacia mundohet të krijojë por realisht portiere Pickford pothuajse gjatë gjithë ndeshjes ishte i pashqetësuar që tregon edhe ndeshjen shumë të mire të mbrojtjes së Anglisë.
Edhe me zëvendësimet e kryera në minutat e fundit nga të dyja skuadrat nuk ka raste konkrete për të shënuar dhe ndeshja mbyllet 1-0 për Anglinë. Një fitore cinike, ndeshje pa shumë raste por me Southgate që merr 3 pikë në ndeshjen e pare në Grupin D.
