Në ditën e tretë të Euro 2020 luhen 3 takimet e rradhës. Në orën 15:00, në “Wembley” të Londrës, luhet mes Anglisë dhe Kroacisë, ekipi nënkampion i Botës.
Dy favoritët e grupit D do të masin forcat mes tyre, me synimin për ta nisur me fitore kompeticionin. Dueli i fundit mes Anglisë dhe Kroacisë u luajt tre vite më parë. Një takim për Nations League, që u fitua 2-1 nga “Tre Luanët”.
Kramariç kalonte kombëtaren ballkanase në avantazh, por Anglia përmbyste gjithçka falë golave të Lingard dhe Harry Kane.
Ora 18:00 sjell debutimin e Maqedonisë së Veriut në një Europian. Përballë Austria e David Alaba, takim i grupit C.
Ndeshja do të luhet në “Arena Naționala” të Bukureshtit. Te Maqedonia e Veriut luajnë disa futbollistë me origjinë shqiptare si: Ezgjan Alioski (Leeds), Visar Musliu (Fehervar), Egzon Bejtulai (Shkëndija), Ferhan Hasani (Partizani), Enis Bardhi (Levante) dhe Arijan Ademi (Dinamo Zagreb).
Këto dy skuadra ishin në një grup në kualifikueset e Euro 2020, dhe të dy ndeshjet u fituan nga Austria. Në mbrëmje Holandë-Ukrainë (21:00), çifti tjetër i grupit C. Ndeshja do të luhet në “Johan Cruijff Arena” të Amsterdamit.
Tulipanët kanë ambicie të mëdha në Euro 2020 dhe sonte do të synojë vetëm fitoren, por përballë kanë djemtë e fortë të Andriy Shevchenkos.
11 vite ka që nuk ndeshen me njëra-tjetrën këto dy ekipe. Miqësorja e vitit 2010 përfundonte në barazim 1-1.
