Drejtuesit e Kukësit kanë negociuar ditët e fundit me disa lojtarë të kampionatit shqiptar. Emiljano Musta që mbylli sezonin te Laçi dhe dyshja e Kastriotit, Devid de Silva dhe Patrik Bardhi, janë lojtarët me të cilët prej ditësh është biseduar.
Me këtë të fundit ka më pak shanse në krahasim me sa u mendua në fillim, pasi është më afër Dinamos. Mirëpo, shpresat e Kukësit tashmë janë që të zyrtarizojë marrëveshjen me Kastriotin për De Silvën. Nga ana tjetër, edhe mesfushori Herald Marku, si dhe qendërmbrojtësi Dajan Shehi janë në planet e Kukësit. Mirëpo, për të gjithë lojtarët e përmendur Kukësi ka konkurrencë, pasi janë edhe në fokusin e skuadrave të tjera, si Partizani, Tirana apo edhe Teuta, që është interesuar për De Silvën.
Shtatë lojtarë janë larguar deri më tani nga Kukësi. Patrik Eze, Numan Kurdiç, Vesel Limaj, Mehdi Hetemaj, Godberg Kuper, Matheus Leira dhe Mate Tsindsadze kanë prishur marrëveshjen dhe nuk do të jenë më pjesë e skuadrës verilindore.
